Pantoen Atjeh

BUNGOENG JEUMPA ACHEH I

Bungong Jeumpa bungong yang meugah di Nanggroe Acheh
Jioh that leubeh nibak bungong Seulanga

Leubeh that ceudah nibak yang laen
Puteh licen indah lagoina

Di ureueng agam lhat bak punyung
Bak ureueng inong keu hiasan jeumala

Bak uroe mak meugang meusenoh-seunoh bloe
Keunyak sambinoi meuroe raya

Padum jiboh yum hana geupakoe
Bek jireuob nyak putro bak uroe mulia

Di ureueng meukat that cula-caloe
Peutimang ureueng bloe rame lagoina

Geutajo keunoe geutajoe keudeh
Han abeh-abeh ureueng beulanja

Bungong pilihan bak ureueng meukawen
Hana laen yang jeut geubangga

Meuyoe takalon bak pesta kawen
Si puteh licen jeut-jeut jeumala

Bungong nyang geu-seupreu ke ateuh kaso
Tempat eh linto yang geu-peumulia

Bak malam kawen nyak dara-baro ibarat putroe
Nyak Linto-baro bagaikan raja

Nyoe keuh nyang geu-kheun raja si uroe
malam ta lumpoe singoh uroe ka hana

Lon kira gata nyoe tentee ka maklum
Peukaten nyoe bandum peusan donya

Eh noe keuh, kisah nyang jeut lon tuleh
Daweut ka abeh malam ka jula

Nyoe kisah lon ke Jeumpa Acheh
kureung leubeh, meu'ah syedara

Lon lakee rahmat ke bandeum getanyoe
Ke aneuk Nanggroe Iskandar Muda

Bek teudoh talakee bak Po teuh Allah (jameun: Potalah)
Seuramoe Makkah beudame beubahagia

Karya H. M. Nur El Ibrahimy

Jakarta, 20 Desember 2002

BUNGOENG JEUMPA ACHEH II

Bungong jeumpa kon simbol kekerasan
lagee geukeusan le ureueng luwa

Bungong Jeumpa simbol perdamaian dan persaudaraan
Sejak jamen Iskandar Muda

Takalon mantong warna jih puteh
Lambang perdamaian seluruh donya

Meuyoe na kekerasan melanda Acheh
Bek tapeu daleh Acheh semata-mata

Ureueng luwa lah nyang haruih tapeusalah
karena langkah-langkah nyang hana bijaksana

Ureueng luwa yang patot takecam
Karena pelanggaran HAM nyang ubebe raya

Peristiwa Leupueng - Cot Jeumpa patot jeut ke tamse
Disinan leu ureueng nyang tan na salah jeut ke umpeun bede meukenba-keuba

64 droe nyang kon DI/TII pih jitimbak sare
Metimfan-timfan mate, kejam lagoina

Si uroe leubeh dilee 25 nelayan pih jitimbak mate
Awak nyan jitudoh pengikut DB musoh negara

Nyang pelaku pembantaian nyon kheun ahli sejarah
Aneuk buah pasokan Batalion B dan 142

Ubit rayeuk, tuha muda bandum saban
Keureubeun pembantaian lagee bui buta

Meutubi-tubi rakyat Aceh jibedoeh jiproteh ngon resolusi-resolusi
Tapi hate kabinet Ali hana teupeh meu-ube sema

Lam parlemen waki-waki Acheh geumesu mekran-kran
Geukecam kekejaman terhadap rakyat nyang tan salah, nyang hantom soe dengoe na

Bandum-bandum nyan hana pengaroh bak Kabinet Ali
Gobnyan tetap "bertangan besi berhati waja"

Hana salah menyoe lon kheun Ali tetap arrogan
Geupetheun posisi gobnyan, tapi geuabaikan kepentingan rakyat jeulata

Seakan-akan peristiwa nyan hana perelee that tapakoe
Lagee-lagee na perasaan "mate kon lakoe, rugoe kon atra"

Toh nyang nyoe, Toh nyang kon, hana lon maklum
Nyang tepeue bandum hanya Allah Ta'ala

Nyang trang geupegah peue nyang jipelaku le tentra hana salah menurot hukum,
Awak nyan jipeulindong le Negara Republik Indonesia

Menyoe cara lagee nyan posisi gobnyan gepetheun
Peue mantong nyang akan lon kheun hana le guna.

Ate lon luka, ie mata lon ile
hana abeh pike kekejaman lagee nyoe terjadi lam nanggroe Panca Sila

Sejak lon lahe hantom te dengoe lagee nyoe terjadi
Hatta lam perang sabi ngon kafe Baulanda

Saboh pelanggaran HAM nyang cukop berat
Ji perusak martabat tentara Indonesia

Hantom ji ba bak pengadilan
Pemeriksaan terhadap pelaku pih, hantom teudeugoe na

Peue nyang lon tuleh nyoe bit-bit kon beurakah
katom ji syarah lam harian PERISTIWA

Lom geubaeu le T. Ali Basyah lam "Pemberontakan di Acheh
wartawan telebeh bak masa nyan di kutaraja

Seupo sinyak nyang han teupeh perasaan
Pat insan nyang han rho ie mata

Bagi geutayoe nyang ureueng Acheh, peristiwa lagee nyoe cukop that saket
Tapi bek sagai taraket jeut ke dendam nyang mengancam kehidupan bersama

Peristiwa nyang that saket nyoe ta anggap mantong takeudi Tuhan
Hana sagai daya bagi insan untok jitulak kadla dan kada

Sigoe treuk lon peugah kejadian lagee nyoe tekeudi Tuhan
Untok geu uji peue keuh iman nyang ngon lisan saban ngon nyang lam dada

Taharap that-that peristiwa seudeh nyoe bejeut ke cambok
Bagi perjuangan ta petrok cita-cita mulia

Dalam hai nyoe lon peuingat that-that bek salah langkah
Hingga terjadi lom pertumpahan darah nyang sia-sia

Uleue beumate ranteng bek patah,
Meunankeuh peutuah nek-moyang geutanyoe nyang bijaksana

Dalam hai nyoe beutegoh-tegoh bek sampoe jeut ke Panglima Tibang
Geumenyebrang ke pihak musoh karena terpengaroh ngon peng Beulanda

Meunanchit bek tasetot habib Abdurrahman,
Geutiek sinan pimpinan nanggroe karena ulee gobnyan ka jibloe uleh Beulanda

Sikudoe ngon nyan Teuku Umar Johan Pahlawan (Made in Holland)
Geutinggai kawan seperjuangan geuperpihak kepada Beulanda

Uleh Beulanda jipeugot asrama ke gobnyan dkk di Lam Pisang,
Tamah lom jipeuseunang dengon candu dan rupia

Bersama Beulanda pertahanan Acheh geuseurang,
Hana geupantang awaknyan saboh Nanggroe ngon gobnyan,
Aneuk cucoe Iskandar Muda.

Baroe-baroekon na benteng Acheh nyang hantom jireubot le pihak musoh,
Ngon bantuan gobnyan jinoe ka jatoh lam jaroe Beulanda

Dudoe teuma gobnyan geuriwang ke pihak Acheh
Karena that beugeuh kepada Beulanda

Surat penghargaan Raja Beulanda nyang geulakee le gobnyan han jitem bi,
Ambisi pribadi beujiangkat ke ureueng rayeuk Acheh hana jipeudoli le Pemerintah Hindia Beulanda.

Malang, lom lom terjadi kekejaman selam masa DOM
Sayang, rakyat hantom jijeut buka suara

Perasaan Acheh leu that-that teupeh
Ate Acheh leu that-that luka

Tapi, haba lagee nyoe got bek le ta peugah
Lon takot meutamah parah suasana sengketa

Calitera nyang meunoe got bek le takheun
Apui nyang ka leun bek le hu teuma

40 thoen sabe Acheh geumuprang
Hana tom senang selayeeu merdheka

26 thoen mantong perang RI - GAM
Perang nyang that panyang lheuh ngon Beulanda

Beu leu that tasyuko ke nyang peujeut alam
Perang RI - GAM ka mulai reda

Berkat persetujuan antara RI ngon GAM
Nyang ban-ban nyoe meusidang di kuta Jenewa

Geutanyoe talakee uroe dan malam
Dame di Darussalam beurijang teuka

Na peutuah nek-moyang nyang han jeut tatuwoe
Le geutayoe cucoe Iskandar Muda

Meuyoe keunong musibah nyang meutaloe-taloe
Bek reijang that geutanyoe putoih asa

Pat ujeun, adoe meutuwah, nyang hana pirang
Pat prang, baci peugah, nyang hana reda

Peu keuh Persetujuan RI - GAM ek selesoe ngon djroh
Hana lon tuoh, tergantung peunoh bak nyang meuseungketa

Talakee bak Tuhan dumpeue beujrouh
Bek le timoh bibet-bibet sengketa

Geutanyoe talakee bak Ilahi Rabbi
Perdamaian nyang abadi beurijang teuka

Beutatepue, Bungong Jeumpa kon asesori AK-47
Nyan bandum jiboh-boh le ureueng luwa

Ji peleut ureueng ke nanggroe Acheh
Menurot ahli tareh, "A Powerful State" di NUsantara*)

Kisah nyoe lon top ngen Assalamu'alaikum
Keu bandum rakan lon, tuhan dan muda

Seumoga narit dan saleuem lon na nyang tem bapoe
Ke Tgk. Hasan Tiro di Swedia

Ohnoe mantong nyang jeut lon tuleuh
Operasi militer gohlom abeh terlaksana

Bungong Jeumpa Aceh (I dan II) lon sempurnakan bak uroe Rabu
tanggai 10 maret 2004

OLEH; Nasruddin AB